這回要冒激怒兩個姊姊的危險, 因為準備揭露一些兒時我們三姊妹在家玩的無聊玩意.兒時家境一般, 雖未至清貧, 但很少有新玩具, lego都是小四才有一間小屋, 也不是父母買的. 那時玩得最多是換衫公仔, 都是紙造的, 較富貴一點也是紙造的, 有A4紙那麼高的公仔, 頭髮可不是紙的, 有得玩, 像Barbie一樣. 而Barbie和椰菜娃娃我也是中學才有得玩, 那時姊姊們都長大了, 只有我自己一個人玩.
幼年及小學時, 三姊妹在家都有不少搞笑的玩意, 記得大學時告訴友人們, 各人都笑得飛眼水.
這次和大家分享, 不知又會有多大反應.
1. 香港小姐
相信不少女孩子也玩過吧. 那時我們愛用一支"不求人"(我家叫它作"妹仔手")當那支權杖, 然後拿張氈當那紅袍. 這個遊戲有時不只我們三人玩, 姊姊同學來我們家也一起玩, 笑餐死.
2. 美人魚
通常在床上玩. 道具: 每人枕頭一個. 方法: 把雙腳放入枕頭內, 每隻腳分別放在枕頭兩邊(枕頭袋內), 你說像不像美人魚?! 我很有勇氣才敢在這裡說出來!
3. 宿舍
在碌架床下, 用毛氈把床分成三格, 用衣夾夾好毛氈在架上. 一人一格不就像三間不同的宿舍房間嗎? 這個很好玩!
4. 大家姐扮聖母
這個說起來都令人尷尬! 話說小時候我們都有上天主教的教堂, 大姊更是虔誠教徒, 不過三姊妹只有她出生後接受洗禮, 所以在我們三姊妹當中, 那時在信仰上她有"崇高的地位"! :) 於是又是在床上玩的遊戲, 她用毛氈蓋著身子, 飾演聖母, 而我和二姊則是平信徒, 要拜她尊敬她... 嘩, 想起來她也頗有權威的! (點解會睬佢聽佢點?!)
5. 換鞋
這個是三四歲時玩的, 連鄰家那個曾經問我會否和他結婚的小男孩也有份玩過. 放一張大的摺枱作屏風, 一個孩子矇住雙眼, 負責替枱的另一邊的小朋友換鞋, 而各人的鞋子早前已除下來撈亂了, 當然最後要矇眼的那個可以正確地替各人穿上一對一對的鞋子才算勝出.
6. 沖涼遊戲
我和二姊曾幾何時一起洗澡, 有很多遊戲的啊! 其中一個是拿著水桶作湯煲, 然後說要去送湯, 跟著又扮飲湯. 可以玩許久. (據二姊補充, 是豬骨湯來的!)
7. 大戲
母親提供資料: 我們喜歡用長褲當手袖做粵劇.
8. 電視劇集模仿
幼年時喜歡扮演不同劇集中的女角, 如"乘風破浪", "白羊, 天蠍, 水瓶座"等等. 小學時和同學總愛玩"幻海奇情"系列的"四人歸西", 嚇餐死!
26 comments:
小弟在家中是排行最少的，兩個姐姐成日迫我陪她們玩煮飯仔，仲有試過要我扮C9同佢地買菜講價! XD
仲有就係三條友響上格床扮坐小巴/巴士，但次次都係我做司機！
MC~
我諗玩乜個個屋企分別都幾大，始終年紀同埋個家庭組合個個都唔同，淨係我全屋係仔已經唔會玩到你寫喎呢d。
哈哈! 好掂呀妳哋三姊妹! 真係好正!!! XDDDDDD
我以前都同由細玩到大嘅兩個兄弟玩扮豹仔. 即係爬嚟爬去又學豹仔咁爪吓爪吓, 叫吓叫吓咁....
嘩，我最近都諗緊好唔好出賣我大佬，講吓兒時樂事。睇埋你呢篇，真係挑起更多回憶呀。我細個男仔嘢又玩、女仔嘢又玩，諗起都開心呀。
美人魚呢個玩法唔錯！
以前我會和堂妹們玩「Ｘ氏少女漂流記」，玩法係拆晒阿嫲家梳化的cushion (乳膠墊）出來，剩下木椅，然後把cushion當圍板，咁梳化就會好似木筏∼ 跟住用沙灘泥爬扮船漿，再加Ｄ公仔做船員，之後就要扮有激流：「前面有急流，我地爬快Ｄ！」「阿XX(公仔）跌落水啦，快Ｄ拉佢上黎！」
香港小姐同煮飯仔&街市買餸實有玩啦, 仲要係我有個表妹當時好鍾意張曼玉, 要我地叫佢做謝張曼玉(因為佢本身姓謝)!
仲有玩結婚, 一個做新郎一個做新娘(但好多時無男仔, 兩個都係女仔做!), 扮拜堂!
我地仲會玩船家, 都係響床度用氈搭下帳蓬咁, 但就會有時一齊搖, 話"好大浪呀", 同埋有人扮跌落水, 以家庭形式玩, 連表弟都有一齊玩架, 所以唔係女仔的專利呢!
諗起以前的遊戲都開心呢! (似乎而家的小朋友就少咗好多呢類樂趣...我地以前, creative好多, 身邊有乜都玩得一餐!)
mugen c: 哈哈, 小細佬係要俾家姐"hub"架啦. :) 次次做司機, 咁有無影響你大個好怕司機?
3: 係喎, 仔多既屋企一定玩其他野, 有咩玩呀你?
Din: 扮豹? 哈, 唔怪得你宜家咁wild啦.
xiao zhu: 快D寫啦! :) 我細個都有玩車仔架, 門開得果D跑車仔.
maki: "Ｘ氏少女漂流記" 無睇過喎, 你肯定細我好多. :) 細路仔真係個個都好有想像力.
閒遊: "謝張曼玉"笑死! 細個真係creative好多!
1. 玩扮香港小姐，我一定要做冠軍 :）
2. 扮新聞報導員
3. 扮老師學生遊戲
4. 拖住餅盒扮空姐
5. 訓阿媽張床扮游水
6. 扮大俠打交同點穴唔准郁
你個段大家姐扮聖母笑死我﹗即刻諗緊如果佢家陣做節目扮會點．．．
啤:
1/ 知你啦!
2/ 做到啦! ;)
3/ 老師學生去同學屋企同人地玩多
4/ 拖住餅盒你都諗到!!?!?!?!? 哈, 你好女仔喎.
點穴無玩過喎... 大家姐... 你咪亂講野呀! :)
我玩摺，由細到大都係。打機多，由細到大都係，而家同兩個仔都係。XD
3: 細個都無乜機打... 過橋抽板果D呀?
香港小姐我有玩, 鄰居通常爭做冠軍果個, 我鐘意做"最上鏡小姐" 或(自己認為係)最靚果個, 例如李美鳳.
nikita: 點都要爭架果陣, 不過輪流做冠軍囉, 仲要扮林良慧咁大叫!
我以前玩比較特别的有以下,
1. 在床上玩露營.
2. 玩煮飯仔, 食物係花生.
uncle ray: 點解我地細個咁鍾意響床上玩既? 男仔都玩煮飯仔?
哈哈....好得意！我細個都玩一齊沖涼！
sa: 細路沖涼好多野玩! :)
sorry it should be "sc", not sa. :)
哈, 我同你應該差成個年代, 不過兒時遊戲也差不多:
~紙換衫公仔, 但比你的簡單, 我還會自己做衫給她們的
~香港小姐, 我都係扮林良慧
~美人魚, 不過我係把兩隻腳穿入阿媽的一條睡褲管
~碌架床下層, 我地會佈置成古裝床, 古代公主馬車, 洞穴等
~ 沖涼遊戲, 我地會把一些木板放在浴缸頂, 然後扮岩石洞
~ 大戲 (我都有!!!)
~ 電視劇集模仿 (當然有啦! haha! 當年有套劇集叫綠水英雌, 我地從梳化跳落地, 然後扒到客廳的另一端扮游泳比賽)
以下網友的我都玩過:
~ Maki的梳化cushion 當木筏
~ 啤啤熊的扮大俠打交同點穴唔准郁
~ uncle ray的玩露營, 不過我係床下底
諗起細個真開心!
愛美: 咪扮老啦, 我諗我地唔係差好遠啫."綠水英雌"都有少少印象. 仲有小鹿純子呢, 我家姐成日梳佢個髮型返學! 我以為無人會玩美人魚添! :) 好好笑.
我細個時愛玩「天降甘露」(十八樓窗外小解)和訓練金魚們「高台跳水」
好變態 ^.^"
嬲記: "十八樓窗外小解" 嘩, 好衰呀! 你細個住邊頭? 唔知有無人"賴"過野呢?
我住TST
但係果鎮時玩這些無聊野
是在我cousin家
他住沙田 ;P
嬲記: 好彩我未住過沙田啫! :) TST, 我出世後都住過吓, 不過應該同你唔同年代lu.
你又啟發到我很想寫這topic!扮聖母那個很正。沖涼遊戲都係!
josefina: 你家也是女孩多, 想必也有許多搞笑遊戲, 快點寫啊!
Post a Comment