好耐無追無記啲劇啦, 呢套"The Drive of Life"(死未?!)都有啲聲勢咁, 係繼前排"溏心風暴"之後另一齣如果響屋企都會睇吓嘅電視劇, 不過唔得閒都無錄低, 所以今個星期其實只睇咗星期一同今晚兩集.講吓幾個中年男主腳先, 劉松仁真係越老越掂, 佢後生果陣真係又瘦又削, "京華春夢"果陣真係唔鍾意佢, 但近年做親劇都好掂, 記得早幾年拍陳慧珊, Flora都有啲襯佢唔起呀! 今次"歲月風雲"暫時睇佢都真係演得好過三哥好多好多, 殺哂! 個髮型令人聯想到日本前首相小泉純一郎! :)
三哥真係好似好少飾演呢種唔多掂既孻仔角色, 雖然佢好努力, 但略嫌浮誇, 眼神做得唔多掂, 完全俾劉松仁搶哂.
今晚見到伍衛國都出埋場, 又係越老越掂, 比後生果陣掂幾多呀!
飾華振民/田振民果個內地演員馮紹峰(二哥個仔)都幾好樣, 偶然有少少大陸feel, 但青靚白淨, 起碼好過假鼻人同賣飛佛先啦(唔好話我知你唔知邊個整過個鼻喎!)!
講開劉松仁同伍衛國, 我就一定覺得劉正好多. 我二家姐話伍可能有少少脂粉味, 我覺得佢有少少師奶look囉以前.
阿二家姐話我成日扮唔記得, 又唔肯認, 其實我就真係唔記得囉. 佢話細個時我同佢成日玩扮做人阿媽, 著住大人嘅高踭鞋, 佢老公係伍衛國, 我老公係鄭少秋喎, 我就真係無印象啦. 佢話我細個勁鍾意秋官, 宜家死口唔認, 我淨係記得細個鍾意溫拿嘅Alan啫, 果陣阿姨仲帶我去唔知演唱會定咩, 我同Alan影過相架! 鍾意秋官, 真係無印象, 不過宜家都唔反感既對佢, 即使佢揀咗官晶華... :P 咁如果你宜家問我秋官同伍衛國, 我都寧願揀秋官... 呀, 不過前兩星期響時代廣場撞到佢同官晶華&個女, 佢好老好瘦呀... 上鏡先OK.
再講, 劉, 伍, 鄭, 咁我都係揀劉松仁啦!
********
我左眼好弱八完電視, 講吓我隻左眼啦. 琴晚約咗兩個教會姊妹晚飯, 佢地一直都話同我補祝生日, 我都話唔好, 我都無咩點同佢地慶祝生日, 唔好意思嘛, 不過最後真係佢地請, 多謝哂!
琴日響公司, 做野做到五六點開始發覺隻左眼有啲痛, 係眨眼時痛, 以為好似前排右眼個眼球有少少痛一樣, 應該係神經線影響. 一路都無乜理佢.
夜晚食飯時, 友人叫咗支紅酒, 佢有coupon/discount, 送成支, 三四個人飲, 幾好味, 澳洲酒. 但唔知點解, 可能支酒唔係12/3%alcohol咁簡單, 一向好酒量嘅我飲咗一陣, 可能空肚, 望住出面個海忽然覺得有啲唔妥. 有少少暈, 不過之後又無事.
然後一路傾偈一路覺得隻左眼上眼皮開始重, 又好似越黎越痛, 但友人望一望都唔覺腫.
到咗食到七七八八, 我一個人去廁所, 兩次差啲PK, 啲酒都真係幾勁, 我諗我頂龍飲咗兩杯咋嘛. 入到廁所照照鏡, 嘩, 隻眼開始少少腫啦真係, 弊.
返到屋企, 再腫啲. 落咗妝, 仲勁, 紅紅地添! 有少少驚, 洗唔洗去嘉諾撒或者養和睇門診呢?! 仲上咗個零鐘頭網添... 都諗到今日未必返工架啦.
今朝起身, 隻眼仲靚啲, 垂咗一半落嚟! 咁緊係借啲椅唔返工去睇醫生啦, 話係眼瘡喎, 又嚇我話可能要割架! 要食五日抗生素, 又有消腫藥同眼藥水. 呢個醫生我自中三開始睇佢, 差不多從未開過抗生素我食, 今次我竟然要食, 真係大鑊!
醫生紙上寫我個病係Chalazion, 我咁八, 返嚟就緊係上網搵吓資料啦, 學咗個term. 之前問醫生我係咪生眼挑針, 佢話唔係, 雖然類似.嗱, 咁眼瘡同眼挑針有咩分別呢(網友阿PK_哥哥有份鼓勵我今日寫呢個topic架!), 眼挑針英文係Stye, 眼瘡英文叫Chalazion.
原來Stye主要係細菌感染, 比較快啲好番, 通常出現響近眼睫毛個位, 好紅好腫, 腫過眼瘡.
而Chalazion(a lump in the eyelid that is caused by inflammation of a gland within the skin)係因為眼皮內一啲皮脂腺塞咗而起既, 通常出現響上眼簾, 下眼簾都可能會, 不過較少.
我今日都睇咗一輪有關資料, 想知更多有關stye(眼挑針)同chalazion(眼瘡)嘅分別, 可睇呢個網: Styes and Chalazia.
網上資料亦有教用暖毛巾敷吓隻眼有助消腫, 今日都敷咗三四次啦, 一陣再敷多次先.
唉, 我隻左眼真係好唔乖, 做過兩次視網膜手術又係佢, 兩次眼腫又係佢, 聽吓話啦唔該!
25 comments:
我成日覺得劉講野時會噴口水~ :p
話說有年世界盃，我睇左幾晚通霄，結果.....生眼瘡，醫生要我即刻割，割左好過食藥呀~ 其實只係打麻醉針時有d"吉"，唔係好痛，過兩日就無晒事~
sa: 吓?!?!?!? 通完頂起眼瘡! 佢都係話我唔夠瞓呀! 響醫院度割??? 唔驚咩???
i. 男人越老越正 ga~ 唔羨慕得咁多 ga 喇! AhHaHaHa!
ii. "劉松仁vs.伍衛國vs.秋官" ---> 依正嘅次序梗係劉伍秋 la! 其實, 我一向唔覺得鄭有乜咁正.
iii. "阿二家姐話我成日扮唔記得, 又唔肯認, 其實我就真係唔記得囉. 佢話細個時我同佢成日玩扮做人阿媽, 我老公係鄭少秋喎, 我就真係無印象啦. 佢話我細個勁鍾意秋官, 宜家死口唔認, .....鍾意秋官, 真係無印象, ....."
呀!!!!! 呀哈哈哈哈哈哈哈哈哈!!!!!!! 笑死我喇就嚟!!!!!! 哈哈哈哈哈哈!!!!
喂, 心理學上有一樣嘢係咁咖! 就係潛意識強行 delete 掉一啲唔想記得嘅回憶. Haaaaa!!!! 可能妳都接受唔到細個嘅時候鍾意鄭少秋呀!!!! 哈哈哈哈哈哈!!!! 阿大, 妳細個嘅 taste 好正呀吓!!!! 不過呀, 都好過鐘意朱唇王子蔡楓華呢! XDDDDD
iv. "我淨係記得細個鍾意溫拿嘅Alan啫, 我同Alan影過相架!"
知啦知啦! 妳提過好鬼多次喇!!!!!
v. "再講, 劉, 伍, 鄭, 咁我都係揀劉松仁啦!" <--- 嗱, 而家大個咗, oD taste 就正番晒嘞! XDDDDDDD
vi. "唉, 我隻左眼真係好唔乖, 做過兩次視網膜手術又係佢, 兩次眼腫又係佢, 聽吓話啦唔該!"
眼好脆弱, 亦最珍貴, 唔再勸咁多喇, 總之妳自己都聽吓話啦唔佳!
嘩!估你吾到啊!Adam鄭!?也許睇得太多楚留香？
btw,take care and get well soon ah!
好心你休息下la.
我是右眼多問題, 由細到大好易生瘡, 也有多次視網膜發痰, 整眼通紅.
男人也不是每個都越老越掂。踫到過劉松仁及秦漢，真是極掂，秦漢更是帥得沒話說。但有次踫到狄龍就“騎呢”得有點嚇人，難以想像是位昔日巨星。
MD，好好保重眼睛呀！你覺唔覺呢，我們會定期檢查牙齒，但眼睛這麼重要，我們對它的注意、愛護卻好像相對少得多。
老聽到認識的人眼睛有事，有人治療後需俯睡一段日子以康復﹔有人要休息在家一星期，甚麼也不能看，要塗上藥閉上眼﹔有人生了眼石，要眼睜睜看著醫生割除﹔有人突然眼睛痛極入院，差點失明。
Din: 咁都要睇人既, 有啲人就二字頭時都仲可以大大聲, 三十以外就每況愈下, 好慘不忍睹架囉... "潛意識強行 delete 掉一啲唔想記得嘅回憶" TIL 你咪同我講psychology啦唔該, 又學人講! 蔡楓華就絕對無可能啦. 細個時你估唔係學啲大人咩, 緊係唔知邊個阿姨鍾意秋官我又學埋一份啦. Alan副相好珍貴架, 咩呀! 我啲taste一向都OK, 所以我每次見到你都無胃口... :P
kajie: 哈, 我細個都唔係睇好多電視劇, 楚留香可能都係望過吓咋... 一定係啲大人影響.
uncle ray: 視網膜發炎??? 你指角膜吓嘛? 視網膜發痰響後邊架喎, 會發炎架咩?
閒趣: 秦漢有少少台灣"leung"味... 狄龍唔得咩原來? 我年年驗眼架, 我咁蛇gwei, 以前視網膜有事, 自此年年都check, 醫生話我好OK架. 今次係唔夠瞓累事. 多謝提醒.
Excuse me. 我真係唔知那個整過個鼻, 不止, 還有那個是賣飛佛? 唔該enlighten下我.
我都係勁鐘意劉松仁架! 因為我覺得佢係一個好有理想的演員. 而且他是零緋聞的. 直覺他是一個好男人(雖然現實中未必一定好相處). 我常覺得同米雪一齊果個, 點解係尹佬而唔係佢? 有人幫佢地整左個網站, 叫"聽松賞雪"--好靚.
阿大, 我都食過吓夜粥咖! 咩 Birth Order 呀, Eight Ego Defend Mechanism 呀, Multi Personality 呀, Polymorphously perverse 呀, Three Essays on the Theory of Sexuality 呀咁都讀過吓 ga 我! 咁梗係唔夠妳勁啦!
"所以我每次見到你都無胃口..."
真咖..... :(
唓, 我夠見到妳反胃 tim 咯!!!!!!!!!!!!!!!!!!!!!!!!!! ><
judick: 假鼻人係林峰, 賣飛佛咪吳卓羲囉. "聽松賞雪"咩咁犀利?!?!
巔: 嘩, 哂冷呀? 我唔記得咁多terms... 咪撻我啦... =__=
我做細嘅, 唔敢~~~~~
;P
留唔到言啊!!!!
好像可以了。不過已經唔記得想講咩...
啊係...老細，眼唔好仲上網寫blog睇電視，太唔乖啦。好心抖下啦。
真係要保重呀！！！
Din: 唓...
cosmicrays: :) 咁我咪諗住去跳舞囉今晚... :(
xiao zhu: thank you.
對, 角膜炎才對.
原來Chalazion在香港的中文係稱眼瘡，我之前淨係知道大陸好似係用日本的名稱：麦粒腫。也知道Stye其實係好似pimple 那樣，不過生在eyelid度0姐。所以中文概念一直以爲叫眼瘡囖。現在我覺得，d terms真係0吾翻中文好過，翻左中文簡直係一大混亂了。睇完英文再睇中文又或者先睇中文睇英文，真係睇到我眼癱癱。
我細個對眼都好prone to Chalazion囉,後來有個很好的醫生教我開始有symptoms就即刻拿乾菊花泡滾水來燻眼。幾掂，不過可能又因個人不同狀況而定。Stye就真係易擺平好多了。
jk: 乾菊花泡滾水來燻眼? 即係用D蒸氣黎steam吓隻眼? 下次(touch wood)試試先... 呢兩日咪成日暖敷隻眼囉... :( thanks!
係啊，燻完幾舒服，又有淡淡菊花香。
最不濟的境況都係去eye specialist度擺平，我相信現在的麻醉針已經係無痛吧，係做完幾個小時要包住隻眼先有d irritating.
Good luck!希望0吾會影響你寫blog的熱情啦。
但係跳舞身水身汗容咩易yip到眼？小心D啦。
jk: 你指去specialist度擺平, 係做小手術攪掂佢? 唉希望唔洗啦...
cosmicrays: 我無乜汗, 最多都係"立立地", 唔會滴汗. 返咗黎啦, 好攰!
係眼科診所割呀~
當時都驚架，但又唔驚得咁多，因為由診症至離開離開診所都只係半個鐘，快靚正呀~
又有次返返下工，突然隻眼矇查查睇唔到野，當時幾驚會盲呀，即刻去睇眼科，原來有咩“xx電腦侯群症”，即係眼睛攰得濟起革命，唔肯睇野喎~ (當時已連續幾個月，日日對住部腦做野做足十二個鐘)，身體真係要好好保養呀~
三哥...正! =)
sa: "xx電腦侯群症" 吓, 咁得人驚????
小蓓: 你鍾意三哥? :) 咁我都寧願揀佢都唔揀劉華! :)
Post a Comment