大家遇過最辣的店舖老闆是怎樣的? 類似趕客的那種呢. 相信他們都是"唔志在"的店東兼店舖的業主才可以如此惡死.想說的是一間位於銅鑼灣利園山道Krispy Kreme鈄對面左近的一間小型芭蕾舞襪及舞衣店. 我從未光顧過, 因為一向只光顧芭蕾舞用品店, 都是樓上舖的, 一般習舞的都會去的那數間店舖. 而這間惡死老闆開的小店, 去買都是因為相信價錢較便宜, 又方便, 營業時間又長.
路過數次去問想買的物品, 都得到惡死對待. 他們是不會讓客人走進店內看的. 你要什麼就站在店舖前問吧, 問多一句都被鬧.
多次了, 每一次我都放棄, 問吓啫, 洗死咩!
今天下午去了公司附近一家芭蕾舞專門店買了數件衣物, 卻忘了要添購芭蕾襪, 於是下課後跑去問, 挑戰這對惡夫婦. 果然厲害!
我: 想問有無Capezio芭蕾襪, 白色或粉紅色?
惡婦在收拾店門外的物品準備關店, 斜視了我一下: 咩?
我: 厚身芭蕾襪, 白色或粉紅色, 有無Capezio?
惡婦: 厚身芭蕾襪就有, 無你講個牌子 (咁即係唔係專門店囉... Capezio都無!)
我: 咁厚身啦, 咩牌子都得 (應該平好多啦)
惡婦對其沒有表情的老公說: 攞對XXXX....
老伯遞了一個包裝細小的白色芭蕾襪給我, 外面寫上日語, 沒有寫size...
我: 啱架啦?
惡婦: 我地唔會拎啲唔啱嘅嘢出嚟俾人嘅!
我: 無, 咁我諗我咁大件驚唔啱啫...
惡婦: 人地啲模特兒嚟買都係咁, 唔啱攞番嚟!
趕客程度有9.9囉! 不過對襪真係抵, $38, 剛試過, 質地又確係幾好...
15 comments:
旺角有間“又新玩具”﹐賣Sanrio貨又平又正﹐不過個老闆娘就十年如一日咁好火氣。次次去次次都見佢鬧D客。我都比佢鬧過好多次。。。不過佢D野真係平過出面﹐所以每次都係死死地番去。。 ~_~
惡人多數係貨好 ：）
冬冬講果間細舖仔係我年青既時候都幫襯過呀. hehehe.... 唯有話呢類舖頭用惡形惡相而令大家記得佢啦. selling point, 最少今日mad dog會講呢間舖. (阿Q精神)
哈哈。見咗好多好惡嘅八婆八公老闆（娘）之後，覺得係佢哋嘅一個marketing strategy嚟嘅。佢哋唔惡，你點同人哋描述間舖啫~
冬冬: 哈哈! 宜家仲喺度架間嘢?
aulina: 不過連望吓啲貨多一陣嘅機會都無, 如果俾我睇耐啲, 我可以幫襯多幾次嘛.
虎茶: 你鬧唔鬧客架?? :)
cr: 間接幫佢宣傳添... 策略嚟架原來!
芭蕾舞衫好靚靚, 可惜小時候不知何解母親要我學中國舞~ :(
karelian: 我最初都學過中國舞, 後來先學ballet. :)
咁寸的店不買算了。
uncle ray: 但人地又平又正喎啲貨...
我一定唔會鬧客. 好注重CS架. 對客發痺氣唔係今時今日既服務態度.
EQ唔好, 做咩都死啦. 唔好講做front line
虎茶: :) 唔知有無機會幫襯你呢??? :)
零售服務業，態度唔好乜都假，D貨第度都有得買，貴20%買服務態度，值呀。
飲食業又唔同，出品隨時第度無得食，惟有忍。
cosmicrays: 睇心情啦, 有時為咗條氣要順, 咪唔鬼去幫襯囉, 食/用品一樣.
呢間鋪出名寸，不過看伯伯和嬸嬸的站姿，我懷疑他們是跳舞的:P
之前我買技巧鞋，佢都係講返同一句： "人地啲模特兒嚟買都係咁, 唔啱攞番嚟!"
maki: hahahh! 竟然係咁! 笑死!
Post a Comment