七友團拜

百樂潮州酒家的反沙芋

新十四才終於與好友們團年/團拜. 又為了要遷就"老闆"星期三才有時間出來吃飯, 於是有人不去上跳舞課(咪我囉!), 有人不上gym, 有人未病癒, 而我更要晚飯後趕回家和公司來個conference call...

短短兩小時左右的飯聚, 雖然大家都有講有笑, 不過言談間都感到大家很累, 身心俱疲. 今天的主題是: 打工可唔可以打到五十幾? 大家都不約而同地為未來擔憂... 沮喪!

其實大家的工作及/或生意都算比上不足, 比下有餘. 有兩位的工作他日又有長糧, 且是十分可觀的. 大部份都有物業, 又有投資... 更有人有不錯家底(嗱, 咪扮唔係呀吓... 當然唔係我)... 但何解大家都那麼杞人憂天?

我提到網友前陣子介紹過的退休計算方程式(www.myretirementnumber.com), 然後解說我的數字. 不過我假設65歲退休, 又假設現在完全沒有積蓄. 好友們都異口同聲地說: 65?! 唔係呀化?! 而且我揀了"無休生活"(每月支出屬中等享樂型), 那個數字好像是$7000多. 她們都說: $7000幾?! 交完水電煤, 差餉... 請問你仲有幾多剩?! 小姐, 你好似要食high tea, 要買手袋要去旅行架呵?!

嚇呆!

然後有許多你一言我一語...

有人說, 她多年前已計算了... 要維持現有的生活質素, 退休時要有一千四百萬現金, 當然另外已有一兩幢物業... 1400萬?! 洗唔洗???? 驚嘛大家?! 呢位小姐好似做保險架噃... 數口好精...

那你回加拿大還需要那麼多現金? 那邊福利好噃? "加拿大幾貴你知唔知? 宜家睇齣戲十蚊加幣! ... 你仲要去睇戲, 睇咩電影節!" "你唔俾我第日好命屋企有個家庭影院呀?"(發緊夢!)

同時有人說打算五十多歲找份receptionist來幹, 清閒又沒有壓力. 我說: "姐姐, 人地點解要請你五張幾做receptionist呀? 我啲aunties都想囉... 你真ideal!"

然後有人說很想學做facial, 開美容院, 又荒謬地想, 即使去百佳做收銀也可以... 不過好似佢會有豐厚長糧噃, 點解要去收銀呢請問?!

接著, 我們哈哈大笑地說她不勝任百佳收銀員一職:
1. 人地好快手架! 仲要記得: "今日無膠袋日... "
2. 仲有: "呢行只收八達通同現金... "
3. 可能要搬埋貨噃
4. 企足咁多個鐘, 攰鬼死!

百佳唔得!

其實大家都工作得很辛苦... 有人說: "每日都喺度捱日子咁... 呢兩個星期好多會開... " (好似出於一位大家閨秀嘅口噃... ) "Mid-life crisis呀!"小姐說.

"俾人'兜'鬼咗嘅話都唔知點呀... "

又有人說, 不會要小孩子. "生一個, 會將你個退休年期延遲十年!" 點解?! "四百萬呀一個!" "咁有啲人覺得生仔有回報噃... 他日個仔/女養番佢... " "哼, 宜家仲有呢樣嘢? 唔會有人再咁諗架啦!" "咪係, 你啲仔女大咗, 你係咪要出錢佢結婚/買樓呀, 你實會架喎... 回報?! 回咩呀?!"

新正頭, 為什麼都那麼灰?

不過都有人精神爽利的... 有人買多一幢新樓作投資.

姊姊們, 我們是否杞人憂天了一點? 未來不是那麼壞吧... ?

不過多聽多問都好, 起碼好友提醒: 咪咁大洗呀... MPF夠三份一咋, 要有基金, 保險, 積蓄... 不過1400萬... 我至多唔去食咁多high tea囉... :(

*是夜去了銅鑼灣百樂潮州酒家, 價錢比以前昂貴了不少... 不太飽, 位位$150... 最好吃都是那碟反沙芋.